മണ്ണാംങ്കട്ടയും കരിയിലയും

***********************************

പത്തൊമ്പതാം ആണ്ട് ... ഒരു റിവ്യൂ

ജീവിതത്തിൽ എന്തും വരുന്നിടത്ത് വച്ച് കാണാം എന്ന് വിചാരിക്കുന്ന ഒരുത്തിയും എല്ലാ കാര്യങ്ങളും മുൻകൂട്ടി പ്ലാൻ ചെയ്തു അതേ പോലെ നടത്തിയെടുക്കുന്ന ഒരുവനും .

ഒരാൾ കിഷോർ കുമാർ ഫാൻ  ആണെങ്കിൽ മറ്റെയാൾ ജയചന്ദ്രൻ ആരാധകൻ. 

ഒരാൾക്ക് വാ തോരാതെ സംസാരിക്കുന്ന സ്വഭാവമാണെൽ മറ്റെ ആൾ വാക്കുകൾ അളന്നു തൂക്കി സംസാരിക്കുന്ന പ്രകൃതം. 

ഒരാൾ കട്ട ധോണി ആരാധിക ആയപ്പോൾ മറ്റെയാൾ കോഹ്ലിയോടുള്ള ബഹുമാന സൂചകമായി ടാറ്റൂ വരച്ചു മസിൽമാനായി വിലസും. 

ഒരാൾക്ക് മധുര പലഹാരങ്ങൾ ഒരു മാനസിക രോഗം പോലെയാണെങ്കിൽ മറ്റെയാൾ ബേക്കറിയുടെ ഉള്ളിൽ പോലും കയറാത്ത വ്യക്തി.

ക്ലാസ്സിക് സിനിമകൾ കാണാൻ ഇഷ്ടമുള്ള ഒരാളും തട്ട് പൊളിപ്പൻ കോമഡി പടങ്ങൾ മാത്രം കാണുന്ന മറ്റൊരാളും. 

ഒരാൾക്ക് സ്പോർട്സ് എന്നത് ടിവിയിൽ വരുമ്പോൾ കപ്പലണ്ടിയും കൊറിച്ച്  കണ്ടു രസിക്കാനുള്ളതാണെങ്കിൽ മറ്റെയാൾ നാൽപ്പത്തി നാലാം വയസ്സിലും കയ്യിലും കാലിലും ബാൻഡും കെട്ടി ബാഡ്മിൻ്റൺ കളിക്കാൻ ഇറങ്ങും.

സദാ നേരവും ആരോഗ്യവും ഫിറ്റ്നസും എങ്ങനെ വർദ്ധിപ്പിക്കാം എന്ന ആലോചനയിൽ അവനും വണ്ണം ഇനിയും കൂട്ടാതെ ഇന്ന് എന്തൊക്കെ തട്ടാം എന്നാലോചിച്ച് നടക്കുന്ന അവളും.

പ്രധാന ദിവസങ്ങളിൽ കാണ്ഡം കാണ്ഡം ആയി കഥകൾ എഴുതുന്ന ഞാനും പിറന്നാളിനും വാർഷികത്തിനും ഗൂഗിളിൽ പോയി ആശംസകൾ തപ്പിയെടുത്ത് "വെൽകം ടു ഊട്ടി.. ഗ്ലാഡ് ടു മീറ്റ് യു" മട്ടിൽ ചുരുക്കത്തിൽ പോസ്റ്റ് ഇടുന്ന അദ്ദേഹവും.  

ചുരുക്കത്തിൽ അലുവയും മത്തിക്കറിയും പോലെ, മോരും മുതിരയും പോലെ, ലോറലും ഹാർഡിയും പോലെ, പ്രേം നസീറും അടൂർ ഭാസിയും പോലെ, ബിജു മേനോനും കുഞ്ചാക്കോ ബോബനും പോലെ ഈ മണ്ണാംങ്കട്ടയും കരിയിലയും കഴിഞ്ഞ പത്തൊൻപത് സംവത്സരങ്ങളായി മഴയത്തും കാറ്റത്തും കാറ്റും മഴയും  ഒന്നിച്ചു വന്നപ്പോഴും ഒരു സംയുക്ത സഖ്യമായി ഒന്നിച്ചു മുന്നേറി രണ്ടാം പതിറ്റാണ്ടിലേക്ക്  വലത് കാൽ വച്ചു പ്രവേശിക്കുന്നു എന്ന് ഇതിനാൽ എല്ലാവരെയും അറിയിച്ചു കൊള്ളുന്നു. 

നിങ്ങളുടെ ആശംസകൾ സ്റ്റിക്കറുകൾ ആയും പൂച്ചെണ്ടുകൾ ആയും എത്തിച്ചു അനുഗ്രഹങ്ങൾ വർഷിക്കൂ...